MANILA, Philippines — Naibaba na sa ‘moderate risk’ ang buong Metro Manila dahil sa patuloy na pagbaba ng mga bagong kaso ng COVID-19.
Ito ang kinumpirma kahapon ni Department of Health (DOH) Secretary Francisco Duque III dahil sa pagbaba sa-39% ang COVID-19 growth rate mula Mayo 2-Mayo 15 buhat sa dating-46% growth rate.
Bumaba rin ang attack rate sa 13.44 cases per 100,000 population sa parehong petsa buhat sa dating 24.9 cases per 100,000 population.
“Ibig sabihin nito, bumabagal na ‘yong pagdagdag o paglaki ng kaso,” paliwanag ni Duque.
Sa kabila naman ng pagbababa sa ‘general community quarantine with heighted restrictions’ ang Metro Manila, lalawigan ng Rizal, Bulacan, Cavite at Laguna, hinikayat pa rin ni Duque ang mga lokal na pamahalaan na magpatupad ng ‘localized o granular lockdowns’ kung kinakailangan para maampat ang pagtaas ng mga kaso sa tukoy na mga lugar.
Bumaba na rin ang ‘healthcare utilization rate’ sa bansa sa 46% nitong Mayo 16 mula sa 54% noong Abril habang sa Metro Manila, bumagsak ito sa 45% mula sa 68% noong nakaraang buwan.