MANILA, Philippines — Inihayag kahapon ni Presidential spokeperson Harry Roque na lumagpas na umano sa milyon ang mga Filipino na nabakunahan kontra COVID-19.
Ayon kay Roque hanggang nitong Abril 12, Lunes, ay umabot na sa 1,007,356 indibiduwal ang nababakunahan ng unang dose kontra COVID-19 habang 132,288 na ang nakumpleto ang dalawang dosage ng bakuna.
“We are third in Southeast Asia, behind Indonesia na may 14.7 million doses administered at Singapore na 1.7 million,” pagmamalaki ni Roque sa Palace briefing.
Sa higit milyong nabakunahan, 965,169 doses ng COVID-19 vaccine ang naibigay sa health workers, ang una sa prayoridad sa vaccination program ng gobyerno.
Nasa 280,569 doses ng COVID-19 vaccine ang itinurok sa National Capital Region—ang epicenter ng COVID-19 pandemic sa bansa.
Nasa 3,025,600 doses ng Sinovac at AstraZeneca COVID-19 vaccine supply naman ang dumating at naideliver na sa bansa.