MANILA, Philippines — Upang masakote ang siyam na pulis-Jolo na sangkot sa pagbaril at pagpatay sa apat na sundalo noong nakalipas na taon ay nagpatulong na ang Philippine National Police sa Philippine Army sa malawakang manhunt operation.
Ang siyam na pulis na pinaghahanap ay kinabibilangan nina Senior M/Sgt. Abdelzhimar Padjiri; M/Sgt. Hanie Baddiri; S/Sgt. Iskandar Susulan; S/Sgt. Ernisar Sappal; Cpl. Sulki Andaki; Pat. Moh Nur Pasani; S/Sgt. Almudzrin Hadjaruddin; Pat. Alkajal Mandangan; at Pat. Rajiv Putalan na sinampahan ng four counts ng murder at planting of evidence.
Ang mga ito ay sinasabing responsable sa pagkamatay ng mga intelligence operatives noong Hunyo 20, 2020 na kinabibilangan nina Maj. Marvin A. Indammog, 39; Capt. Irwin B. Managuelod, 33; Sgt. Jaime M. Velasco, 38, at Cpl. Abdal Asula, 33.
Sinabi ni Sinas na patuloy ang kanilang pakikipagdayalogo sa mga suspek, subalit hindi pa desidido ang mga ito sa kanilang pagsuko kaya nagbigay na rin sila ng kopya ng arrest warrant sa PA at National Bureau of Investigation (NBI).
Aniya, kung patuloy ang mga suspek sa kanilang pagtatago, patuloy din ang manhunt operation at hindi niya magagarantiyahan ang kanilang seguridad habang nagtatago sa batas.