Police station sa Maguindanao, inatake ng 50 terorista
MANILA, Philippines — Nasa 50 miyembro ng Bangsamoro Islamic Freedom Fighters (BIFF-ISIS) ang umatake sa isang police station sa Brgy. Poblacion, Datu, Piang, Maguindanao, kamakalawa ng gabi.
Ayon kay 6th Infantry (Kampilan) Division spokesman Lt. Col. Anhouvic Atilano, alas-10:30 ng gabi nang umatake ang mga terorista sa police station na walang habas na nagpaputok at nanunog ng police patrol car.
Ang mga umatakeng terorista na may dalang bandila ng Islamic State of Iraq and Syria (ISIS) ay pinamumunuan nina Kumander Karialan Saga Animbang at Kumander Motorola sa ilalim ng grupo ni Shiek Esmail Abdulmalik alyas Kumander Abo Toraife ng BIFF-ISIS.
Tumagal ang palitan ng putok sa pagitan ng mga pulis at terorista gamit ang mga matataas na uri ng armas.
Sinabi naman ni 6th ID chief at Joint Task Force Central commander Maj. Gen. Juvymax Uy na agad nakapagresponde ang mga sundalo na tumulong sa mga pulis.
Umatras ang mga terorista nang gumamit na ng mga Semba armored carrier ang tropa ng pamahalaan at dumating pa ang karagdagang puwersa.
Walang nasugatan sa panig ng mga pulis at sundalo habang hindi pa matiyak ang panig ng BIFF.
- Latest