Mga minor puwede sa malls na nasa MGCQ — Malacañang
MANILA, Philippines — Pinayuhan ng Malacañang ang mga magulang na maghanap ng mall na nasa ilalim ng modified general community quarantine (MGCQ) para doon dalhin ang kanilang mga anak na menor de edad.
Ito ay matapos magdesisyon ang mga Metro Manila mayors na papasukin ang kanilang mga anak sa mall na nasa ilalim ng GCQ tulad sa Metro Manila.
Ayon kay Roque, nasa kapangyarihan talaga ng mga Metro Mayors ang desisyon tungkol sa edad ng mga kabataan na puwedeng pumasok sa mga malls lalo na ngayong Kapaskuhan.
Sinabi ni Roque na hindi naman ipinagbabawal ang pagpunta ng mga residente sa general community quarantine (GCQ) sa mga lugar na nasa ilalim ng MGCQ dahil kailangang buhayin ang mga negosyo.
Ipinaalala rin ni Roque na base sa guidelines ng Inter-Agency Task Force (IATF) on Emerging Infectious Diseases, kapag ang lugar ay nasa MGCQ, puwedeng lumabas ang mga 21 hanggang 15 taong gulang pero depende pa rin sa diskresyon ng mga local government units.
Sinabi naman ni Metropolitan Manila Development Authority (MMDA) General Manager Jojo Garcia na bagaman at ibinasura ng mga mayors sa Metro Manila ang panukalang payagan ang mga menor de edad sa loob ng mga malls ay maaari naman silang pumasok sa mga medical establishments.
- Latest
