MANILA, Philippines — Hindi basta-basta ituturok na lang sa target na mahigit isang milyong Pinoy ang nakalaang 2.6 milyon shots ng coronavirus disease 2019 vaccine mula sa AstraZenec na donasyon ng pribadong sektor.
Ito ang paglilinaw kahapon sa Laging Handa briefing ni Health Undersecretary Mario Rosario Vergeire sakaling papasa ang bakuna sa regulatory process sa Pilipinas.
Ang donasyong nagkakahalaga ng P600 milyon mula sa pribadong sektor ay advanced commitment para makatiyak na may nakalaan nang bakuna.
Noong Biyernes nagkaroon ng tripartite agreement ang Pilipinas, pribadong sektor at AstraZeneca para sa suplay na 2.6 million doses ng bakuna ng COVID-19. Ang AstraZeneca-Oxford’s COVID-19 vaccine ay 70% epektibo laban sa COVID-19 sa unang dose at tumaas pa sa 90% matapos ang ikalawang dose na ibinigay makalipas ang isang buwan.
Paliwanag ni Vergeire, kailangan pang dumaan sa regulatory process sa bansa ang AstraZenaca vaccine para sa clearance ng Food and Drug Administration (FDA) at payagan na sa merkado sa pamamagitan ng rehistro.