12 kongresista na humihingi ng porsyento sa DPWH projects pangalanan
MANILA, Philippines — “Huwag magkubli at pangalanan ang 12 kongresista na humihingi ng porsiyento sa lahat ng proyekto ng DPWH.”
Ito ang hamon ni Infrawatch PH Convenor Terry Ridon kay Presidential Anti Crime Commission(PACC) Commissioner Greco Belgica at huwag magtago sa naging pahayag ni Pangulong Rodrigo Duterte na wala siyang hurisdiksyon kaya hindi niya isasapubliko ang nilalaman ng PACC report na nagdedetalye ng korapsyon sa DPWH na sangkot ang mga congressman.
Sinabi ni Ridon, sa oras na matanggap ng Office of the Ombudsman ang PACC report mula sa Malacañang ay may obligasyon na itong isapubliko ang mga pangalan kaya walang dahilan para ipitin pa ito ni Belgica.
Ganito rin ang paliwanag ni Justice Undersecretary Adrian Sugay, aniya, kapag naipasa na kay Ombudsman Samuel Martires ang PACC report ay bahagi na ito ng public record kaya matutukoy din ang pangalan ng 12 congressman na iisyuhan ng subpoena.
Aminado si Sugay na bilang taxpayer ay nais din nitong malaman kung sinu-sino ang mga tiwaling kongresista na tinukoy sa report.
Sa 12 kongresista na tumanggap ng payola, may ilan na P10-M ang kickback, may isa na humihingi ng hanggang P100-M habang ang iba ay 5% hanggang 15% ang cut sa infrastructure budget sa kanilang distrito.
Nananatiling tahimik naman ang tanggapan ni House Speaker Lord Allan Velasco na kung saan sa ilalim ng House Rules ay maaaring magsagawa ng imbestigasyon motu propio ang House Ethics Committee laban sa mga kongresista na sinasangkot sa katiwalian, subalit aminado si Iloilo Rep. Janette Garin na pagsasayang lang ng oras kung magsasagawa ng imbestigasyon.
Nangangamba ang Infrawatch na kung hindi tutukuyin ang 12 congressman ay mauulit muli ang korapsyon sa 2021 budget kung saan nasa P650-M hanggang P15-B ang infrastructure funds ng bawat kongresista na nasa DPWH budget.
- Latest