Duterte naka-monitor sa bagyong Rolly
MANILA, Philippines — Inihayag kahapon ni Senator Christopher Lawrence “Bong” Go na personal na tinututukan ni Pangulong Rodrigo Duterte ang mga kaganapan ng Bagyong Rolly na sinasabing pinakamalakas na bagyong papasok sa bansa ngayong taon.
Ayon kay Go, bukod sa kanilang pagmo-monitor sa bagyo, tiniyak na rin ni Duterte na mabibigyan kaagad ng tulong ang mga maapektuhang lugar.
“Patuloy naman po ang monitoring namin ni Pangulong Duterte sa status ng bagyong ito. Sinisigurado ng Pangulo na laging handa ang mga ahensiya ng gobyerno na magbigay ng immediate assistance sa mga lugar na maapektuhan po ng bagyo,” ani Go.
Partikular na pinag-iingat ang mga residente sa Bicol, Calabarzon, Mimaropa at Central Luzon.
“Sa mga kababayan ko po, lalo na diyan sa Bicol, Calabarzon, Mimaropa at Central Luzon, kailangan na naman nating maghanda sa bagong bagyong Rolly. Kalalabas lang po ng bagyong Quinta, ito na naman po, inaasahan na mas malakas ang bagyong ito,” dagdag ni Go.
Sinabi rin ni Go na naka-red alert na rin ang Armed Forces of the Philippines at naka-evacute na sa ligtas na lugar ang mga military assets katulad ng barko at eroplano.
- Latest