MANILA, Philippines — Hindi na ipatutupad pa sa mga lugar na idedeklarang “new normal” o “post-community quarantine” ang mga “restrictions” na ipinatutupad naman sa mga lugar na nasa ilalim ng modified general community quarantine (MGCQ).
Sa Laging Handa online press briefing, sinabi ni DILG Undersecretary Jonathan Malaya na kailangan lamang sundin ang mga minimum health standards pero wala nang mga bawal.
“Ang kasiguruhan lang po ‘pag sinabing new normal ay kailangan sumunod sa mga minimum health standards ngunit iyong mga restrictions makikita natin under the Modified General Community Quarantine ay hindi na po natin makikita dito sa new normal. Dahil nga po sa new normal, it’s now under a post-community quarantine scenario,” paniniyak ni Malaya.
Sinabi pa ni Malaya na bagaman at wala ang kumpletong datos, ang isang lugar na walang community quarantine ang ilalagay sa new normal na kayegorya.