MANILA, Philippines — Nagulantang ang mga natutulog na residente ng Occidental Mindoro matapos silang yanigin ng 5.4 magnitude na lindol kahapon ng madaling-araw.
Ayon sa Phil. Institute of Volcanology and Seismoloy (Phivolcs), dakong alas-4:06 ng madaling-araw nang tumama ang lindol na ang sentro nito ay nasa 23 kilometro ng timog-kanluran sa bayan ng Looc. Tectonic naman ang ugat ng lindol at umaabot sa 33 kilometro ang lalim ng lupa ng pagyanig.
Bunga nito, naramdaman ang lakas ng lindol sa Intensity 4 sa Abra de Ilog, Occidental Mindoro; Tagaytay City habang Intensity 3 sa Mamburao, Occidental Mindoro at ibang bahagi ng Metro Manila sa Muntinlupa City; Makati City at Quezon City. Intensity 2 naman sa Marikina City; Malabon City; Meycauayan City, Bulacan; Floridablanca, Pampanga at Intensity I sa Mauban, Gumaca, at Lopez, Quezon; Cabanatuan City; Palayan City.
Pasado alas-9 ng umaga kahapon nang magkaroon ng pitong aftershocks sa nasabing lindol.