MANILA, Philippines — Para maipatupad pa rin ang physical distancing ay payag ang Inter-Agency Task Force on Management and Emerging infectious Diseases (IATF) na iklian ang oras ng curfew sa Metro Manila at ipatupad ang work shifts.
Ito ang sinabi ni IATF Vice Chairman at Cabinet Secretary Karlo Nograles, na ang pagtatakda sa mga manggagawa na magreport ng magkakatulad na oras ay maaring mahirap na ipatupad ang social distancing.
Habang ang staggered work shift naman ay maaaring hindi maipatupad kung maagang ipapatupad ang curfew hours kaya para maipatupad ito ay iklian ang curfew na mula sa dating 9 pm ay maaring gawing 1 am.
Tatanungin din umano nila ang Metro Manila mayors kung payag sa ganitong alituntunin, bagama’t tama naman ang mga alkalde na magpatupad ng curfew para madisiplina at maipatupad ang peace and order sa kanilang nasasakupan.
Karaniwang nagsisimula ang curfew sa ilang lugar sa Metro Manila ay alas-10:00 ng gabi at nagtatapos ng alas-5:00 ng umaga .
Idinagdag pa ni Nograles na dapat ipagpatuloy pa rin ng mga negosyante ang set up na work from home habang ang mga mall at groceries ay dapat na payagan sa mas mahabang oras para may mabilhan ang mga mangagawa ng kanilang mga kailangan.