MANILA, Philippines — Nanawagan si House Appropriations Chairman at ACT-CIS Cong. Eric Yap sa kanyang mga kasamahan sa Kongreso matapos ang napabalitang plano na kudeta laban kay Speaker Alan Peter Cayetano na isantabi muna ang pulitika at magsakripisyo ngayong pandemya para sa taumbayan.
Bukod dito ay umugong din ang balitang masama ang loob ng ilang mambabatas dahil binawasan ang budget sa kanilang distrito.
“Sana maintindihan ng mga kasama natin dito sa Kongreso na may krisis tayo ngayon at kailangan magsakripisyo dahil priority ang pagbili ng bakuna laban sa Covid kapag ito ay lumabas na,” ayon kay Cong. Yap.
“Mag-focus na lang sa pagbalangkas ng mga batas kung papaano makakarekober ang lahat matapos itong pandemya,” dagdag ni Yap.
Nauna nang sinabi ni Yap na inaasahan nila ang budget deficit sa susunod na taon dahil tiyak hindi makakalap ng gobyerno ang buwis na target nito ngayong taon dahil sa pandemya.