Department of Disaster Resilience Bill aprub na sa Kamara
MANILA, Philippines — Inaprubahan na sa ikatlo at huling pagbasa ang panukalang batas na naglalayong magtatag ng Department of Disaster Resilience (DDR) upang mapabilis ang pagtugon sa malalaking kalamidad sa bansa.
Sa botong 241-7-1, tuluyan nang nakapasa sa 3rd at final reading ang isa sa prestihiyosong panukalang batas ni Deputy Speaker at 1Pacman Rep. Mikee Romero na magbibigay ng malaking partisipasyon sa paghahanda sa anumang kalamidad na maaaring dumating sa bansa.
“Kailangan po ito ng ating bansa, na nais kong hilingin sa ating mga kasamahan sa Senado na mapag-aralan at maipasa agad upang tayo ay maging handa sa anumang sakuna. Lalo pa ngayong tayo ay dumadanas ng pandemya sa bansa. Mas lalo natin dapat paghandaan ang kalamidad,” pahayag ni Rep. Romero na kasalukuyan ay umabot na ng 702 ang panukalang batas.
Kasabay nito, nagpaabot din ng pasasalamat si Rep. Romero sa mga kasamahang mambabatas at kay House Speaker Alan Peter Cayetano para sa pagpasa nito sa Kongreso na magiging malaking tulong sa bansa at ekonomiya sa oras ng kalamidad.
- Latest