MANILA, Philippines — Nakasama sa listahan ng Forbes magazine sa top 50 si House Deputy Speaker at 1 PACMAN Partylist Rep. Mikee Romero na pinakamayamang mambabatas sa Kamara na ang net worth ay $135-M o P6.5 bilyon.
Ang Forbes magazine ang naglalathala ng mga bilyonaryong personalidad sa buong mundo at maging sa ranking sa kani-kanilang mga bansa.
Ang pagiging prominente ni Romero sa mga pinakamayang personalidad ay hindi na bago simula noong pumasok ito sa Mababang Kapulungan ng Kongreso noong 2016.
Si Romero ay nakapaghain ng 700 panukalang batas sa Kongreso simula nang maging kongresista noong 2016 kung saan 47 dito ay naging batas.
Kabilang dito ay pagpapalawig sa drivers license ng limang taon, Free Irrigation Act, Philippine Sports Training Act, PhilHealth coverage sa lahat ng may mga kapansanan at panghuli ay ang Bayanihan To Heal As One o Bayanihan 1 at Bayanihan to Recover As One o Bayanihan II upang matulungan ang mga Pinoy sa matinding epekto ng COVID-19 pandemic.