MANILA, Philippines — Umaabot sa P27.2 milyong halaga ng hinihinalang shabu ang narekober ng pulisya sa bubong ng isang abandonadong apartment na itinago ng isang babaeng drug suspect sa Brgy. Paligsahan, Quezon City kahapon ng umaga.
Ayon kay Quezon City Police District (QCPD) Director PBrig Gen. Ronnie Montejo, batid na nila ang pagkakakilanlan ng drug suspect ngunit tumanggi muna itong isapubliko dahil sa isinasagawang followup operation.
Batay sa ulat, dakong alas-10:30 ng umaga nang masamsam ng mga tauhan ng Kamuning Police Station 10, ang apat na kilong shabu na nakasilid sa travelling bag sa bubong ng isang bakanteng apartment sa 31 Panay Avenue, Brgy Paligsahan.
Nauna rito, pumasok sa bakanteng apartment ang suspek at doon isinagawa ang pagtimbang ng dala nitong shabu. Gayunman, may nakakita umano sa ginagawa ng suspek kaya’t inireport ito sa Drug Enforcement Unit (SDEU) ng Kamuning Police Station subalit hindi na nila naabutan ang babaeng suspek.
Nang halughugin ang lugar, dito tumambad ang isang itim na travelling bag na naglalaman ng nasabing droga ng P27,200,000 at dalawang timbangan.