Pagbakuna kay Duterte sa Mayo 2021 pa
MANILA, Philippines — Posibleng sa Mayo 1, 2021 pa maaaring magpabakuna si Pangulong Rodrigo Roa Duterte ng gamot laban sa COVID-19 mula sa Russia.
Ito ang sinabi ni Presidential spokesperson Harry Roque, dahil sa Setyembre ay magkakaroon ng review ng vaccine expert panel ng resulta ng clinical trials, Phase 1 at Phase 2, na ginawa sa Russia.
Mula Oktubre naman aniya hanggang Marso ay magkakaroon ng clinical trials, phase 3 na sabay na gagawin sa Pilipinas at Russia. Ang Russia ang siyang magpopondo ng clinical trials na gagawin sa Pilipinas.
Ani Sec. Roque sa Abril ay inaasahan na marerehistro ang bakuna ng Russia sa Food and Drugs Administration (FDA).
“Kaya sa Mayo 1, 2021 pa lang puwedeng magpasaksak ng bakuna na galing Russia ang ating Presidente Rodrigo Roa Duterte,” ayon kay Sec. Roque.
“Uulitin ko po, inaasahan po natin na magpapabakuna ang ating Pangulo dito sa Russia na bakuna sa Mayo 1, 2021,” dagdag na pahayag ni Sec. Roque.
Samantala, masayang ibinalita rin ni Sec. Roque na bukas ang Russia sa transfer of technology para sa local manufacturing ng vaccine.
- Latest
