MANILA, Philippines — Bilang proteksiyon laban sa coronavirus (COVID-19) ay inihayag ng pamunuan ng Light Rail Transit Authority (LRTA) na hindi muna sila nagde-deploy ng ticket tellers sa mga istasyon ng Light Rail Transit Line 2 (LRT-2).
Ito ang sinabi ni LRTA spokesperson, Atty. Hernando Cabrera, at sa halip na sa ticket tellers ay sa vending machine na lang muna maaaring makabili ng ticket ang mga pasaherong sasakay sa kanilang mga tren.
“Sa linya naman po, lately ho two weeks ago we started procedure na di na kami nagbebenta ng ticket using teller namin sa Line 2... wala ng teller na nagbebenta ng ticket,” ayon kay Cabrera.
Paglilinaw naman ni Cabrera, hindi tinanggal sa trabaho ang mga ticket teller dahil patuloy pa rin silang magtatrabaho para umalalay sa mga pasahero na bibili ng ticket sa vending machines.
Kinumpirma rin ni Cabrera na may dalawa nang office-based na empleyado ang LRTA na nagpositibo sa COVID-19 kamakailan at kasalukuyang naka-quarantine na.