PCSO aayudahan ang Lotto, Keno agents
MANILA, Philippines — Inihayag ng pamunuan ng Philippine Charity Sweepstakes Office (PCSO) na kanilang pagkakalooban ng financial assistance ang libu-libong Lotto at Keno agents sa buong bansa.
Sinabi ni PCSO General Manager Royina Garma na makakatanggap ang may 6,241 na Lotto at Keno agents sa buong bansa ng kabuuang P18,723,000 na halaga ng financial assistance.
“We, at the PCSO Board understand the plight of our individual Lotto and Keno agents. That’s why, as our partners in raising revenues, we also have to look after their welfare during this global pandemic. I have instructed our Branch Managers and all other concerned officials to immediately facilitate the release of the assistance,” saad ni Garma.
Inaprubahan aniya ng PCSO ang pagbibigay ng financial assistance sa pamamagitan ng Board Resolution 109 s. 2020 na aprubado rin naman ng Office of the President.
Layunin nito na matulungan ang mga ahente ng kanilang pangangailangan upang mabawasan din ang kanilang alalahanin ngayong nahaharap sa COVID-19 pandemic.
Matatandaang simula pa Marso 17, 2020 ay sinuspinde na ng PCSO ang lotto operations sa buong bansa upang protektahan ang kanilang mga lotto agents, tellers at gaming public mula sa nakamamatay na coronavirus disease.
- Latest
