MANILA, Philippines — Mas kakaunti na ang naitalang pagyanig sa paligid ng Bulkang Taal, pero paglilinaw ng Philippine Institute of Volcanology and Seismology (Phivolcs) na hindi ibig sabihin nito ay wala nang panganib.
Ito ang inihayag ng Phivolcs na umaasa na kumalma na nang tuluyan ang Bulkang Taal dahil sa patuloy na pagbaba ng mga aktibidad na naitatala.
Sa nakalipas na 24 oras, nakapagtala lamang ng 153 tonelada ng asupre ang nailuwa ng naturang bulkan mula sa dating 344 tonelada kada araw.
Pinakamaraming nailuwang asupre ang bulkan noong sumabog noong Enero 13 na nagluwa ng 5,299 tonelada.
Nakapagtala lamang ang bulkan ng 6 volcanic earthquakes na hindi naman naramdaman ng mga tao.
Gayunman, nananatili pa ring ipinaiiral ng Phivolcs ang Alert Level 4 status sa paligid ng Bulkang Taal dahil sa patuloy na pagkakaroon ng magmatic intrusion sa paanan ng bulkan na indikasyon na posible pa ring may maganap na malakas na pagsabog.
Kung sakaling magkaroon ng malakas na pagsabog ang iluluwa nitong abo ay dadalhin ng hangin pa timog partikular sa lalawigan ng Laguna.