MANILA, Philippines — Kinumpirma ni Cavite Governor Juanito Victor Remulla na idineklara niya ang lalawigan sa state of calamity bunga ng matinding epekto sa phreatic explosion ng Taal volcano sa lalawigan ng Batangas at matugunan ang pangangailangan ng nasa 15,000 evacuees galing Batangas na pansamantalang kinukupkop ng kanilang lalawigan at nasa P15 milyon ang kanilang inilaang pondo para sa pangangailangan ng mga bakwit.
Una nang nagdeklara ng state of calamity ang lalawigan ng Batangas bunga ng pag-aalboroto ng Taal volcano kung saan libu-libong mga evacuees ang nagsilikas sa kanilang mga bahay.
Sinabi ni Remulla na nasa 8 barangay sa Tagaytay City ang saklaw ng 8 KM radius danger zone.
Maliban sa mga evacuation centers, maging ang mga kabahayan ng mga kamag-anak ng mga bakwit sa Cavite ay pinuntahan ng mga ito para pansamantalang makituloy.