MANILA, Philippines — Inilatag na ng Philippine National Police (PNP) ang kanilang ipapatupad na seguridad kaugnay ng pagsisimula ng tradisyunal na Simbang Gabi na mag-uumpisa sa Disyembre 16 ng taong ito.
Sinabi ni PNP Spokesman Police Brig. Gen. Bernard Banac, inalerto na ni PNP Officer-in-Charge Police Lt. Gen. Archie Gamboa ang lahat ng kapulisan sa buong bansa na ipatupad ang paghihigpit ng seguridad sa mga simbahan.
Nabatid na magdedeploy ng mga pulis sa bisinidad ng mga simbahan upang bigyang proteksyon ang mga debotong Katoliko laban sa mga posibleng magsamantala sa katahimikan ng okasyon sa pamamagitan ng police visibility.
Inihayag ni Banac na nasa heightened alert ang puwersa ng pulisya ngayong panahon ng kapaskuhan at ipauubaya na sa mga Commanders kung kailangan pang magtaas ng alerto.