MANILA, Philippines — Isang holdaper ang nasawi makaraang makipag-agawan at makipambuno ng patalim sa pulis nang makitang hinoholdap ang isang babae na mamamalengke sana sa Balintawak Quezon City, kamakalawa ng gabi.
Ang hindi pa nakilalang holdaper ay nasa edad 25-30, may taas na 5’4. slim built, nakasuot ng itim na face mask, puting t-shirt at checkered short pants.
Ayon sa biktimang si Katherine Jane Valdez, 34, ng Ilocos St., Brgy. Bago Bantay, QC, dakong alas-8:15 ng gabi ay naglalakad siya patungong Balintawak Market sa Edsa Balintawak north bound nang dikitan ng suspek at tutukan ng patalim at hinablot ang kanyang bag.
Humingi ng saklolo ang biktima at nagkataon namang nagroronda ang mga pulis na sina Corporals Greggy Albay, Michael Bilar, Sharol De Vera at Benjamin Bongolan ng Traffic Enforcement ng Northern Police District (NPD) at hinabol ang suspek.
Nang makorner ang holdaper sa harap ng isang tindahan sa Bgry. Apolonio Samson ay inundayan nito ng saksak si Cpl. Bilar, subalit nagmintis hanggang mag-agawan at magpambuno ang dalawa.
Kaya’t bumunot na ng baril si Cpl. Albay at pinaputukan ang holdaper na tinamaan ng bala ng baril sa ulo na siya nitong agarang ikinamatay.