MANILA, Philippines — Napatay ng tropa ng militar sa isinagawang surgical operation ang tatlong miyembro ng Bangsamoro Islamic Freedom Fighters (BIFF) sa Shariff Saydona Mustapha, Maguindanao kamakalawa.
Inihayag kahapon ni AFP-Western Mindanao Command (AFP-Westmincom) Spokesman Major John Arvin Encinas na narekober ang bangkay ng mga napatay ng tropa ng Army’s 33rd Infantry Battalion at 12 th Special Forces Company sa isinagawang clearing operation sa lugar bandang ala-1:00 ng hapon.
Sinabi ni Encinas na nagsagawa ng surgical operation ang Joint Task Force Central laban sa grupo ng BIFF sa ilalim ng paksyon ni Bungos kahapon ng umaga at umabot ng ilang oras ang bakbakan bago nagsitakas ang mga kalaban.
Agad namang nagsagawa ang mga sundalo ng combat clearing operations at nakita ang tatlong bangkay na pawang mga armado ng isang 5.56 MM K2 assault rifle at isang cal. 45 pistol.