3 timbog sa P1.3 milyong shabu
MANILA, Philippines — Nadakip ng mga otoridad ang tatlong drug pusher sa isinagawang buy-bust operation sa Main Avenue kanto ng EDSA, Brgy. Socorro, Quezon City, kamakalawa ng gabi.
Kinilala ang mga nasakoteng suspect na sina Kirby Angelo Ruiz alyas Pogong, 30; Albert John Pakinga alyas Johnjok, 19 at Darwin Marie Nonarte, 23, residente ng Cavite.
Sa ulat, bago naaresto ang mga suspek, bandang alas-10:20 ng gabi ay isinailalim sa surveillance operation ang mga suspek na sangkot sa pagbebenta ng droga.
Nang magpositibo ay agad isinagawa ang buy-bust operation sa nasabing lugar na kung saan isang police poseur buyer ang nagpanggap na bibili ng P200,000.00 halaga ng shabu mula kay Pogong na dumating sa lugar kasama ang tatlo pang drug peddler.
Nang magpalitan ng items ay doon na humudyat ang poseur buyer at inaaresto ang mga suspek na nakumpiskahan ng 200 gramo ng shabu na nagkakahalaga ng P1.3 milyon.
- Latest