Ama, 2 anak dinakip sa marijuana
MANILA, Philippines — Naaresto ng mga pulis ang isang ama at dalawa nitong anak na lalaki sa aktong nagbebenta ng marijuana, kamakalawa ng gabi sa Makati City.
Nakilala ang mga naarestong sina Nicanor Santos, 56; anak na sina Nikki Jay, 22; at 16-anyos na si alyas “Jay”, pawang mga nakatira sa Road 2 Block 2 Pabahay, Brgy. Comembo, Makati City.
Sa ulat, nagkasa ang Makati City Police, alas-7:07 ng gabi ng buy-bust operation sa tapat ng bahay ng mag-aamang Santos sa Brgy. Comembo.
Hindi na nakapalag ang tatlo nang palibutan sila ng mga pulis matapos na tanggapin ang P1,000 marked money buhat sa poseur buyer na umaktong bibili ng marijuana.
Nakumpiska sa mga suspek ang siyam na plastic sachet na marijuana at isang bundle na ‘mid-grown marijuana’ na pinabalatan ng plastic na aabot sa P11,000 ang halaga.
Magkakasamang nakakulong ang mag-aama sa Makati City Police Detention Center.
- Latest
