Graduating student pinaglinis ng guro, nakuryente
MANILA, Philippines — Hindi na makakadalo sa kanyang graduation ang isang 20-anyos na BS Forestry Student nang ito ay makuryente habang pinuputol ang sanga ng puno sa bakuran ng kanyang guro kahapon sa Brgy. Raois, Vigan City, Ilocos Sur.
Ang nasawi ay kinilalang si Benedict Gomuyen, ng Ilocos Sur Polytechnic College sa bayan ng Sta. Maria.
Sa ulat, bago nangyari ang insidente, alas-3:35 ng hapon ay isinama umano ng gurong si Elena Ato, 56 ang biktimang si Gomuyen sa kanyang bahay upang ipaputol ang mga sanga ng puno sa kanyang bakuran.
Umakyat ang biktima sa puno at hindi nito nakita ang nakatagong kable ng kuryente at nang humawak ay nangisay ito at nahulog na una ang ulo na bumagsak.
Dinala ang biktima sa Ilocos Sur Gabriela Silang General Hospital, subalit ito ay idineklarang dead on arrival.
Pinag-aaralan ng mga otoridad kung maaaring kasuhan ang guro sa pangyayari.
- Latest
