MANILA, Philippines — Idineklarang dead on arrival ang isang 28-anyos na obrero matapos itong mahulog mula sa ika-16 na palapag na gusali sa Barangay San Lorenzo, Makati City kahapon ng umaga.
Ang nasawi dahil sa matinding pinsala sa ulo at katawan ay kinilalang si Allan Casul, steelman, residente ng Peñafrancia, Antipolo City, Rizal.
Base sa ulat ng pulisya, bago naganap ang aksidente, alas-11:00 ng umaga sa 16th floor sheerwall BPO Building Processing Office 1 na matatagpuan sa Edsa corner Ayala Avenue Barangay Lorenzo, Makati City ay tumuntong ang biktima sa isang plastic board nang ito ay bumigay.
Dumausdos pababa ang biktima hanggang bumagsak sa ground floor ng nasabing gusali. Agad sinugod ang biktima ng kanyang mga kasamahan sa trabaho sa Makati Medical Center, subalit hindi na umabot ng buhay.
Hinala ng pulisya na marupok na ang pinagtungtungan na plastic board ng biktima kaya’t bumigay ito.