MANILA, Philippines — Napatay ang dalawang miyembro ng rebeldeng New People’s Army (NPA), habang apat nilang kasamahan ang nasugatan nang makaengkuwentro ang tropa ng Philippine Army kamakalawa sa Purok Buldozer, Barangay Estrella, Rizal, Nueva Ecija.
Kinilala ang dalawang napatay na rebelde na sina Michael Pagkaliwanagan, alyas Allan Ledesma at isang alyas Miguel.
Ang 4 na nasugatang rebelde ay sina Liezel Labo, alyas “Nido”; Carlos Aguilar, alyas “Badong”; Danilo Sagun, ng Brgy. Estrella, Rizal NE; at Redsa Balatan, alyas “Sining”.
Sa ulat, bago nangyari ang sagupaan, alas-2:30 ng hapon ay nakatanggap ng tawag ang 84th Infantry Battalion sa pamumuno ni 1st Lt Justin Paul Chavez mula sa mga residente na nangingikil umano ng revolutionary tax ang armadong kalalakihan sa lugar.
Kaagad na rumesponde ang mga sundalo at dito ay nagkaroon ng sagupaan at napatay ang dalawang rebelde, pagkasugat ng apat nilang kasama at naaresto ang isang Ernesto Quimzon, 42, ng Brgy. Vega, Bongabon, Nueva Ecija.
Nasamsam ng mga sundalo ang 2 M16 Colt Baby Armalite rifle; 3 cal. 45 ARMSCOR; 15 long magazine ng M16 rifle na may lamang mga bala; 1 granada; 14 na iba’t ibang cellphone sim card; USB; 1 Samsung tablet; 2 handheld radio; at sari-saring subersibong dokumento.