MANILA, Philippines — Dalawang lalaki na umano ay big time drug pusher ang nadakip ng mga otoridad sa isang buy-bust operation, kamakalawa ng gabi sa Pasay City.
Kinilala ang mga nasakoteng suspek na sina Emerson Fernandez, 39, ng General Trias, Cavite at Peter Lanuza, 46, ng Brgy. San Martin de Porres, Parañaque City na kung saan ay nakumpiska sa mga ito ang 6 kilo ng high grade shabu na nagkakahalaga ng P36-M.
Sa ulat, bandang alas-8:00 ng gabi nang isagawa ang buy-bust operation sa pamumuno ni Police Colonel Julius Mana laban sa ilegal na aktibidades ng nasabing mga suspect.
Isinagawa ang transaksyon sa isang sikat na fastfood chain sa kahabaan ng Roxas Boulevard ng poseur buyer ng PNP-DEG at ng mga suspect na tulak ng droga.
Ang mga suspect ay inaresto sa aktong iniaabot ang 47 malalaking plastic packages ng shabu na kinuha ng mga suspect mula sa behikulo ng mga ito na isang Toyota Camry (XAF 784 ).