Laging nagpapasaring kapag lasing...
MANILA, Philippines — Hindi na umabot ng buhay sa ospital ang isang 23-anyos na binata na si Dennis Degado Dagala nang siya ay pagpapalakulin ng kanyang amain na sumabog na ang itinatagong galit dahil sa mga ginagawang pasaring kapag umuuwi itong lasing naganap kamakalawa ng gabi sa Sitio Rumangrang, Brgy. Liliongan, Carmen, North Cotabato.
Batay sa ulat, alas-9:45 ng gabi nang dumating sa kanilang bahay ang biktima na lango sa alak at dito ay pinasaringan ang kanyang amain na si Jonny Layoan Takinding, 40.
Napuno na ang suspek sa biktima na lagi umanong ginagawa tuwing uuwi na lasing kaya’t nagkaroon sila ng mainitang pagtatalo hanggang sa kumuha ng palakol ang suspek at pinalakol ng maraming beses sa iba’t ibang bahagi ng katawan.
Ang biktima ay dinala sa Provincial Hospital, Amas Kidapawan City, subalit idineklarang dead- on-arrival.
Sumuko naman ang suspek sa Carmen Municipal Police Station.