MANILA, Philippines — Sumuko na ang suspek na si Roderick Capulong, 43, na nagmartilyo at nakapatay sa kanyang misis nang ito ay sunduin ng mga otoridad sa bahay ng kanyang kapatid sa Citihomes Subdivision, Brgy. Molino IV, Bacoor City, Cavite, kamakalawa ng alas-11:00 ng gabi.
Inamin ng suspek na nagawa niyang patayin ang live-in partner na si Concepcion Beldad, 39 dahil sa matinding selos.
Si Beldad ay nakatalaga sa Ordinance Violation Receipt Division ng Manila Traffic and Parking Bureau.
Ayon kay Capulong na nagdilim ang kanyang paningin nang sabihin ng biktima na nais nitong makipaghiwalay sa kanya dahil sa pagiging seloso na hindi niya matanggap.
Kaya’t nagkaroon sila ng mainitang pagtatalo ng biktima hanggang sa kumuha ang suspek ng martilyo at hinataw sa ulo ang una na naging sanhi ng agaran nitong kamatayan.