MANILA, Philippines — Kinumpirma kahapon ni Cordillera Police Director Police Brig. Gen. Israel Ephraim Dickson base sa resulta ng autopsy examination ng Baguio City Medico Legal Officer sa bangkay ni Philippine Military Academy (PMA) 4th Class Cadet Darwin Dormitorio ay lumalabas na namatay ito sa hazing.
Si Dormitorio, 20 ay una nang kinumpirma ng PMA na nasawi sa cardiac arrest secondary to internal hemorrhage.
“He suffered from internal hemorrhage in the stomach and lower abdomen”, pahayag ni Dickson base sa resulta ng pagsusuri ng kanilang mga medico legal officer.
Ayon pa kay Dickson, nagsasagawa pa sila ng pag-validate sa impormasyon na kinukuryente umano ang biktima sa isinagawang hazing dito ng kaniyang mga upper classmen.
Hinggil naman sa pagsusuka ng dugo ni Dormitorio, sinabi ng opisyal na posibleng may nabasag sa internal organs nito.
Inihayag din ng opisyal na tatlong kadete, dalawa rito ay 3rd Class at isang 1st Class ang kasalukuyang restricted to custody bunga ng insidente.
Magugunita na si Dormitorio ay dumaing ng matinding pananakit ng tiyan at nagsuka ng dugo bago ito natagpuang nawalan ng malaytao sa kanilang barracks sa Room 209 sa Mayo Hall Annex sa PMA noong Miyerkules dakong ala-1:00 ng madaling araw.
Isinugod ito sa PMA Hospital pero binawian ng buhay bandang alas-5:15 ng umaga nang nasabi ring araw.
Tiniyak naman ni PMA Supt. Major Gen. Ronnie Evangelista na papatawan ng kaparusahan ang mga nasa likod ng pagkamatay ni Dormitorio.