MANILA, Philippines — Inihayag ni Police Col. Redrico Maranan, hepe ng Pangasinan Police, na bago nangyari ang pananambang kamakalawa kay dating governor Amado Espino Jr., ay lumiham ito sa kanya noong nakaraang linggo dahil may natatanggap itong mga pagbabanta sa buhay kaya pansamantala siyang nabigyan ng security.
Paliwanag ni Maranan, base sa kanilang assessment, gun for hire group ang nasa likod ng sinasabing pananambang at hindi mga pipitsugin base na rin sa mga gamit na nakuha sa mga sinakyan ng mga suspek na pulang Hyundai Elantra at gray Ford Everest.
Nakikipag ugnayan na rin umano ang Pangasinan police sa Philippine National Police-Highway Patrol Group (PNP-HPG) para malaman kung sino ang may-ari ng nasabing mga sasakyan.
Tinataya umanong nasa 10 ang suspek sa pananambang sa grupo ni Espino at posibleng mga miyembo ng professional gun for hire group.
Mayroon na rin umanong persons of interest ang pulisya subalit sa ngayon ay nakatutok lang muna sila sa pagkalap ng mga ebidensiya sa crime scene.