NPA rebels na pumatay sa 4 pulis tinutugis
MANILA, Philippines — Pinatutugis ni Philippine National Police (PNP) Chief Gen. Oscar Albayalde ang mga miyembro ng New Peoples Army (NPA) na responsable sa pagpatay sa apat na pulis sa Negros Oriental noong nakaraang linggo.
Nabatid na ginagalugad na ng mga otoridad ang lahat ng sulok ng bansa para madakip ang mga responsable sa pagpatay sa apat na PNP intelligence personnel na pawang nakatalaga sa 704th Mobile Force Company Regional Mobile Force Battalion ng PNP Central Visayas.
Nagpahatid din ng pakikiramay ang PNP Chief sa pamilya nina Cpl. Relebert Beronio, Pat. Raffy Callo Pat. Roel Cabellon at Pat. Marquino de Leon na pinagbabaril hanggang sa mapatay ng mga umano’y miyembro ng NPA sa Sitio Yamot, Barangay Mabato, Ayungon, Negros Oriental.
Bukod sa pamamaril, tinali rin umano ang kamay ng mga biktima sa kanilang likuran at may mga bakas ng torture at paghampas ng matigas na bagay sa mukha dahilan para ma deformed ito at ninakawan din ng mga kagamitan kabilang ang susi ng tatlong motorsiklo at mga armas.
Sa ulat ng pulisya, dakong alas-2:30 ng hapon noong Hulyo 18 nang dukutin ang apat na pulis noong papunta sa kanilang detachment sa Sitio Nabinca.
- Latest
