Tinedyer tiklo sa P7-milyon shabu sa hotel

MANILA, Philippines — Naaresto ng mga otoridad ang isang 18-anyos na binata sa isang anti-drug operation sa hotel at nasamsam ang nasa mahigit P7 milyong ha-laga ng shabu kahapon ng madaling araw sa Caloocan City.

Kinilala ang suspek na si Jaymark Mercene, alyas “Kapre”, residente ng Pasay City.

 Sa ulat, bago nadakip ang suspek dakong ala-1:30 ng madaling araw ng mga tauhan ng Regional Drug Enforcement Unit ng NCRPO at Caloocan City Police Station sa Room No. 7 ng Marsman Hotel na nasa kanto ng Rizal Avenue at 2nd Street sa Gracepark, Caloocan City ay nakipagtransak­syon ang mga huli sa una na bibili ng isang kilo ng shabu.

Isasagawa ang ang transaksyon sa tapat ng isang gasolinahan sa service road ng Pasay City ngunit biglang binago ng suspek ang lugar at inilipat sa Marsman Hotel sa Caloocan.

Pagdating sa nasabing hotel ay hindi na nakapalag ang suspek nang pasukin ng mga pulis ang tinutuluyan niyang kuwarto nang tanggapin ang marked money buhat sa poseur buyer.

Nakumpiska sa suspek ang 10 plastic tie-knot bags na naglalaman ng tig-100 gramo ng shabu, isang plastic sachet na may lamang 50 gramo ng shabu para sa kabuuang 1,050 gramo ng shabu na may hala-gang P7,140,000 at isang P1,000 marked money na isinama sa boodle money na gina­mit ng mga pulis sa transaksyon.