MANILA, Philippines — Tinatayang nasa 10 paaralan ang iniulat kahapon ng pamunuan ng Department of Education (DepEd) na naapektuhan at nasira sa naganap na magnitude 6.1 na lindol sa ilang bahagi ng Luzon at Metro Manila kamakalawa ng hapon.
Ayon sa DepEd, kabilang sa mga paaralan na natukoy na nagtamo ng infrastructure damages ay ang Laukan National High School (Main), sa Bataan; Mabalacat Elementary School, Mabalacat City; Malusac Elementary School, Pio Elementary School, at Camias High School sa Pampanga.
Napinsala rin ang Subic Central Elementary School sa Olongapo City; San Nicolas Integrated School at Sindalan Elementary School sa San Fernando City; Agusin High School sa Zambales at (10) Cupang Senior High School sa Muntinlupa City na pawang nagkaroon ng crack sa sahig, nasirang mga daan, corridors at mga school buildings.