MANILA, Philippines — Sa halip na mga isda ang malambat ng tatlong mangingisda ay pitong bloke ng hinihinalang “cocaine” ang kanilang nakuha sa karagatang sakop ng Brgy. Bugao, Bagamanoc, Catanduanes kamakalawa ng hapon.
Batay sa ulat, dakong ala-1:00 ng hapon habang nangingisda sina Marcel Benosa, 33; Danilo Villasana, 65; at Tirso Bandola, 47, kapwa residente ng nasabing barangay ay nakita nila ang palutang-lutang na itim na lambat.
Nang kinuha ay nakita nila sa loob ng lambat ang pitong bloke na nababalot ng kulay brown na packing tape at may “dollar sign” ($).
Binuksan umano nila ang isa at nakita ang kulay puting pulbos kaya nagduda silang pareho ito ng unang mga nakuha ng mga mangingisda na bloke ng cocaine na palutang-lutang sa karagatan kaya iniuwi ng tatlo at itinurn-over kay Brgy. Kapitan Evan Evangelista na kasamang nagdala sa Bagamanoc Police na agad namang dinala sa Catanduanes Provincial Police Office.
Sa taya ng Catanduanes Police, posibleng umaabot sa market value na P43.175 milyong piso ang halaga ang nakuhang droga.
Ipinadala na kahapon ni Catanduanes Provincial Director Senior Supt. Paul Abay sa regional office ng Philippine Drug Enforcement Agency (PDEA) sa Legazpi City, Albay ang nasabing droga para sa confirmatory test.