MANILA, Philippines — Hindi na umabot pang buhay sa pagamutan ang pangulo ng Association of Barangay Chairman (ABC) matapos pagbabarilin ng ‘di pa natutukoy na suspek habang nasa loob ng isang sabungan sa Lipa City, Batangas nitong Biyernes ng gabi.
Kinilala ng mga otoridad ang napaslang na si Brgy. Antipolo del Sur Chairman Marlon Luanc, nasa hustong gulang at residente ng naturang barangay.
Batay sa ulat, dakong alas-8:00 ng gabi nang pagbabarilin ng mga suspek ang biktima habang nasa loob ito ng Lipa Games and Amusement Complex sa Brgy. Balintawak.
Duguang bumulagta ang biktima habang agad namang tumakas ang mga salarin na sinamantala ang pagkakagulo ng mga tao sa nasabing sabungan.
Nagawa pang maisugod sa pagamutan ang biktima ngunit idineklarang dead-on-arrival.
Nabatid na si Luancing ay ilang termino na nagsilbing kapitan ng Barangay Antipolo del Sur at dati ring kumandidato bilang bise alkalde. Ang anak nitong si Beverly Luancing ay kasalukuyang kandidato sa pagka-konsehal at ang pamangkin namang si Makmak Luancing ay tumatakbong vice mayor ng lungsod ng Lipa.
Patuloy ang imbestigasyon ng pulisya sa naturang kaso.