MANILA, Philippines — Nakaamba ang panghuhuli sa “Angkas” riders nang baliktarin ng Korte Suprema ang naging desisyon ng Mandaluyong Regional Trial Court na nagpapahintulot sa operasyon ng ride-hailing application na Angkas at nag-isyu ng isang temporary restraining order (TRO) laban dito.
Bilang epekto, maaari na muling hulihin ng mga tauhan ng Land Transportation Franchising and Regulatory Board (LTFRB) ang mga tsuper ng Angkas na kumukuha ng pasahero.
Ibinaba ng SC ang resolusyon noong Disyembre 5 at kahapon lang ito naisapubliko.
Nauna nang ipinasara ng pamahalaan ang Angkas dahil maituturing umano silang kolorum dahil hindi umano pinapayagan sa batas ang mga motorsiklo bilang “public transport.”
Noong Setyembre nang panigan ng Mandaluyong RTC ang hiling ng Angkas na preliminary injunction laban sa shutdown.
Kasalukuyang nagpapatuloy ang kanilang operasyon dahil dito.
Ayon naman sa LTFRB, magsasagawa sila ng board meeting para magbalangkas ng resolusyon kung paano ipatutupad ang TRO ng Korte Suprema at mahuli ang mga Angkas drivers.