MANILA, Philippines — Tuloy ang pag-iikot ng Presidential Communications Operation Office sa buong bansa para sa kanilang mini caravan para makausap ang iba’t ibang mga press clubs.
Sinabi ni Presidential Communications Secretary Martin Andanar na unang napuntahan ng kanilang grupo ang Cagayan de Oro, Cebu at mga media organizations sa Metro Manila.
Ayon kay Andanar, layon ng nasabing caravan na maiparating ang mga kampanya tulad ng paglaban sa disinformation at mamigay na rin ng mga media handbook for personal security na handog ng Presidential Task Force on Media Security o PTFoMS.
Kinumpirma rin ni Andanar na kasama na rin sa kanilang caravan ang information campaign hinggil sa Pederalismo na isinusulong ni Pangulong Rodrigo Duterte.
Matatandaang bilang communication agency ng pamahalaan, sinabi ni Andanar na isa sa mga tinututukan ng PCOO katuwang ang binuong PTFoMS ang kaligtasan ng mga mamamahayag sa bansa na siya ring isa sa mga nangunang kautusan ni Pangulong Duterte nang magsimula ito sa pagkapangulo.