MANILA, Philippines — Isang pinaghihinalaang lider ng teroristang Dawlah Islamiyah na si Norhan Sinapan at kapatid nito na si Norton ang nasawi makaraang makaengkuwentro ang pinagsanib na elemento ng pulisya at militar nang pumalag sa pagsisilbi ng warrant of arrest sa Hagonoy, Davao del Sur kamakalawa.
Batay sa ulat, dakong alas-11:20 ng gabi nang magsagawa ng operasyon ang Regional Intelligence Unit, iba pang units ng pulisya at intelligence operatives ng militar laban sa mga suspek.
Habang isinisilbi ng security forces ang warrant of arrest laban sa magkapatid na Dawlah Islamiyah members sa Brgy. Aplaya ng bayang ito ay nanlaban umano ang magkapatid nang paputukan ang mga otoridad na nauwi sa shootout ng kapwa ikinasawi ng mag-utol na terorista.
Nasamsam ng mga otoridad sa encounter site ang isang handgun, dalawang granada, isang Improvised Explosive Device (IED), mga personal na kagamitan at dalawang kulay itim na bandila na ginagamit ng Islamic State of Iraq and Syria (ISIS).