MANILA, Philippines — Dalawang Arabo ang inaresto ng mga otoridad nang maaktuhang bumabatak ng marijuana sa loob ng isang bar sa Brgy. South Triangle, Quezon City kahapon ng umaga.
Ang dalawang suspek ay kinilalang sina Adamhassan Ibrahim, 26, at Osama Shalup Dasaeed, 25, kapwa residente ng 19 D’ University Place Condominium na matatagpuan sa Leon Guinto St., Malate, Maynila.
Sa ulat, bago naaresto ang dalawang Arabo dakong alas- 6:45 ng umaga ay nagpapatrulya ang mga pulis sa lugar nang sila ay makatanggap ng impormasyon tungkol sa nagaganap na pot session ng marijuana sa naturang bar na matatagpuan sa Tomas Morato, kanto ng Eugenio Lopez Drive, Brgy. South Triangle.
Kaagad na rumesponde ang mga pulis at naaktuhan ang dalawa na sumisinghot ng marijuana kaya’t sila ay agad na dinakip.
Nakumpiska mula sa mga suspek ang nakabilot na papel na may lamang sinunog na pinatuyong dahon ng marijuana.