MANILA, Philippines — Hindi na umabot pang buhay sa pagamutan ang isang 30-anyos na negosyante matapos siyang pagbabarilin ng gunman habang masayang sineselebreyt ang kaarawan ng ina at nakikipag-inuman sa ilang kaanak sa Brgy. GRS sa bayan ng Ragay, Camarines Sur, kamakalawa ng gabi.
Sanhi ng matinding tama ng mga punglo sa iba’t ibang bahagi ng katawan, dead-on-arrival ang binatang biktima na si Glen Tamayor habang tumakas naman ang suspek na kinilalang si Geronimo Gamier, 26-anyos, may asawa at kapwa residente ng Sitio Bagong-pook ng naturang barangay.
Sa ulat, dakong alas-7:10 ng gabi, nag-iinuman at nagkakasayahan ang biktima kasama ang ilang bisita at kamag-anak nang dumating ang suspek bitbit ang isang kalibre .45 baril at walang sabi-sabing sunud-sunod na nirapido ng bala ang biktima hanggang sa duguang bumulagta at agad na tumakas sa di malamang direksyon.
Isa sa anggulong tinitingnan ng mga pulis ay ang matagal nang alitan ng dalawa kung saan pinagseselosan umano ng suspek ang biktima.