MANILA, Philippines — Hindi na umabot ng buhay sa ospital ang isang rider matapos na magulungan ng trak na kanyang inobertekan kamakalawa ng gabi sa Muntinlupa City.
Ang nasawi ay kinilalang si Roderick Castelo, 30, nakatira sa Block 5, Lot 329, Bagong Silang, Brgy. Sucat ng naturang lungsod. Agad naman naaresto ang truck driver na si Cesar Romero, 50, ng Phase 3, Block 3, Brgy. Bayanan, Muntinlupa City.
Sa ulat, bago nangyari ang aksidente dakong alas-11:50 ng gabi sa Southbound lane ng Alabang Viaduct, Brgy. Alabang ay minamaneho ng biktima ang kanyang Kawasaki AX125E (ND-741145).
Pagdating sa U-turn slot ay inobertekan ng biktima ang Isuzu Forward Truck 2006 na may plakang 130110 na minamaneho ni Romero.
Kaya’t hindi na nakontrol ni Romero ang preno at nasalpok ang biktima at pumailalim hanggang sa nagulungan ito ng naturang truck.