MANILA, Philippines — Isang 32-anyos na ginang na kararating lang sa Pilipinas mula sa pagtatrabaho bilang domestic helper sa Gitnang Silangan ang nasawi matapos na ito ay maubusan ng dugo sa kanyang ginawang pagpapalaglag sa sanggol sa kanyang sinapupunan sa loob ng isang motel, sa Quiapo, Maynila, kamakalawa.
Ang nasawi ay kinilalang si Nelia Asuncion Sotelo, ng Barangay Barang, Paniqui, Tarlac.
Sa ulat, alas-2:30 nang hapon nang maireport sa Barbosa Police Community Precinct (PCP) ang insidente ng abortion sa loob ng Hotel 99 sa R. Hidalgo St. Quiapo, Maynila.
Bago ito ay nag-check in noong Hulyo 10 dakong ala-1:00 ng hapon ang biktima kasama ang kaibigang si Catherine San Jose, 36, sa Room 526 ng motel at alas-2:00 ng hapon ng araw na iyon ay dumating ang ang isang Luzviminda Tibay, 57, na nagsagawa umano ng pag-abort na nabayaran ng P10,000.
Dakong alas-2:00 ng hapon noong Miyerkules, nang madatnan ni San Jose ang biktima na nakahandusay sa banyo ng motel at umaagas ang dugo sa kaniyang kaselanan at walang malay. Base sa attending physician na si Dra. Stephanie Donato, “Septic Shock from Induced Abortion” ang sanhi ng pagkamatay ni Sotelo.
Naaresto si Tibay na ipinagharap ng kasong kriminal.