MANILA, Philippines — Patay ang apat na lalaki na umano ay kilabot na drug pusher nang manlaban ang mga ito sa magkakahiwalay na anti-drug operation sa iba’t ibang bayan sa lalawigan ng Bulacan, kahapon ng madaling araw.
Kasalukuyan pang inaalam ang tunay na mga pangalan ng mga nasawing suspek na kinilala sa mga alyas na Erwin ng Brgy. Batia, Bocaue; Alyas Sonny Boy ng Brgy. Malhacan, Meycauayan City; Alyas Bino ng Brgy. Maronquillo, San Rafael; at Alyas Jessie ng Brgy. Poblacion, Pulilan.
Ang mga napatay ay nanlaban nang mahalata na ang kanilang mga ka-deal ay mga pulis.
Narekober sa apat na operasyon ang tatlong .38 rebolber, isang .45 kalibre mga iba’t ibang bala, 21 pakete ng shabu, sari-saring mga drug paraphernalias, P2,000 pisong marked money, isang pampasaherong Kawasaki Bajaj (3832-RX) at isang motorsiklong skeletal type na Honda Wave at walang plaka.