Lumalabag sa batas ang aarestuhin hindi mga tambay
MANILA, Philippines — Binigyang linaw ni National Capital Region Police Office (NCRPO) Director C/Supt.Guillermo Eleazar na tanging mga lumalabag lamang sa batas at lokal na ordinansa ang aarestuhin ng mga pulis at hindi ang mga tambay lang na nasa kalsada.
Kaya’t walang dapat ikatakot ang sinuman dahil hindi tambay ang target ng kanilang operasyon at hindi sila basta basta nag-aaresto ng isang taong walang ginagawang kasalanan o paglabag sa ordinansa.
Subalit, maaari naman umanong magsagawa ng warrantless arrest ang pulisya kung mayroong mga paglabag sa batas at ordinansa tulad ng pag-iinom, pagsusugal at paglalakad ng nakahubad sa pampublikong lugar at paglabag sa curfew.
Aminado naman si Eleazar na may mga paglabag din ang mga kapulisan sa ginagawa nilang operasyon tulad na lamang ng pagdampot sa lalaking sumilip sa labas ng kanilang bahay habang nakahubad.
Patuloy na rin umano nilang iniimbestigahan ang nasabing insidente habang ang ilan sa mga sangkot na pulis ay nasibak na sa puwesto.
- Latest