Lola, 2 pa huli sa P1.1-M droga
MANILA, Philippines — Nabitag ng mga elemento ng pulisya ang isang 82 -anyos na lola at dalawa pa nitong kapamilya matapos mahulihan ng bulto ng shabu na nagkakahalaga ng P1.1-M sa buy bust operation sa lungsod ng Batangas, kamakalawa ng gabi.
Sa report ni Police Regional Office (PRO) IV A Director P/Chief Supt. Edward Carranza, kinilala ang nasakoteng matanda na si Estelita Andal, anak nitong si Circoncicion Andal, 59 at manugang na si Danilo Ramos, 32.
Alas-11 ng gabi nang magsagawa ng buy bust operation ang mga operatiba ng pulisya laban sa target na matandang suspek na matagal ng nasa drug watch list sa Brgy. Calicanto ng lungsod.
Nabatid na naki-pagdeal ang matanda sa mga operatiba na bibili ng 58 sachet ng shabu na nagkakahalaga ng P15,000. Habang isinasagawa ang transakyon ay dito na dinakip ng mga operatiba ang mga suspek na pawang mga tulak ng droga sa kanilang lugar.
Lumilitaw pa sa imbestigasyon na ang mag- ina ay madalas magtungo sa lumang palengke ng lungsod kung saan nagbebenta ang mga ito ng shabu.
Samantalang maging ang manugang ng matanda ay naging aktibo rin sa pagtutulak ng droga.
- Latest
