MANILA, Philippines — Nadakip ng mga pulis ang isang ama at tatlo nitong anak na mga miyembro ng isang organized crime group sa Baras, Rizal, kamakalawa.
Kinilala ni PRO4 Regional Director P/Chief Supt. Edward Carranza ang mga suspek na sina Rudy Boquerin Padilla Sr., 73, itinuturing na No. 2 Most Wanted Person (MWP) sa Pangasinan dahil sa kasong pagpatay; at kanyang mga anak na sina Rudy Diaz Padilla Jr., 36, No. 3 MWP sa Pangasinan sa kasong frustrated murder; Michael Diaz Padilla, 29, may kaso ring murder; at Crisanto Diaz Padilla, 31, na may kasong pagpatay.
Pinaniniwalaang nabuwag na ng mga otoridad ang gun-for-hire group na ‘Padilla Largo Organized Crime Group,’ na nag-o-operate sa Pangasinan.
Ang mag-aama ay tubong Lucao District, Dagupan City, Pangasinan, at kasalukuyang nagtatago sa Sitio Galaxy B, Barangay Pinugay dahil sa mga kinakaharap na mga kasong kriminal na naaresto dakong alas-7:30 ng umaga nang pinagsanib na pwersa ng 404th A Maneuver Company ng Regional Mobile Force Battalion 4A (Lead Unit), Force Commander, RMFB 4A; Dagupan City Police Station at Baras MPS.
Nauna rito, nakatanggap ng tip ang mga otoridad mula sa isang concerned citizen na may isang lalaki sa kanilang lugar ang namataang pagala-gala na may bitbit na armas.
Bineripika ang ulat at nang makumpirma na sila ay mga miyembro ng gun-for-hire group sa Pangasinan ay kaagad na isinagawa ang pagsalakay, na nagresulta sa pagkakadakip ng mga suspek.
Nakumpiska sa mag-aama ang isang 12 Gauge Chamber Proof Tested (Shotgun) na may apat na bala, isang kalibre .45 Armscor High Cap na may isang magazine na may 11-bala; at isang .9mm Caliber pistol (Beretta) na may magazine na loaded ng 15-bala.
Pansamantalang nakadetine ang mag-aama sa Baras MPS habang inihahanda pa ang pagsasampa ng kasong Illegal Possession of Firearms o paglabag sa Republic Act 10591 laban sa kanila.