MANILA, Philippines — Isang lokal opisyal ng Comelec ang pinagbabaril ng dalawang lalaki na sakay ng motorsiklo sa naganap na ambush kamakalawa ng gabi sa bayan ng Bauan, Batangas.
Ang biktima na namatay noon din dahil sa mga tama ng bala sa iba’t ibang bahagi ng katawan ay kinilalang si Noel Miralles.
Batay sa ulat, bago nangyari ang krimen bandang alas-6:10 ng gabi ay naghihintay ng masasakyan sa harapan ng Citimart shopping mall sa Brgy. 4 ng bayang ito ang biktma pauwi sa kanilang bahay sa Brgy. Dumantay, Batangas City nang biglang sumulpot sa lugar ang motorcycle riding in tandem at pagtapat sa biktima ay bigla na lamang itong pinagbabaril.
Nang matiyak na patay na ang biktima ay mabilis na nagsitakas ang mga suspek patungo sa direksyon ng bayan ng San Pascual.
Nabatid na ang biktima ay may 20 taon ng nagtatrabaho bilang Comelec Municipal Election Officer sa bayan ng Bauan.